السّماوات السّبعة
السّماوات السّبعة
في لِـيلِةْ كْمَالها هاجتْ
أشجاني
وجيتْ على بالي
ورْقَة وقلَمْ بينْ يديّا
وصُورْتِك بين عينيّا
حَبّيت نرْسْمِكْ!
لقيتْ حْرُوفي هاربة منّي
الكلّها حاشمهْ لا تخذلني
تخذلني كان تغْلِطْ في وصفها
ليك
وانتي البهاءْ والزّين تسمّاوْ
عليك.
لمعِتْ نجمتك في السّماء
وْهَلْ عْليّا نُورْ خيالِكْ،
كلمة وراء كلمة تجاوزتْ الوطا
وسْرَا بيّا طِيفْ غرامك بين
سماواتِكْ
في كلْ سماء تعذّبني جنّتك
وتِطْفى جهنّم غيابِكْ.
~~~~~~~~~~~
1--
ضُحْـكَهْ فَـتَّـانَهْ!
سْرِقْتْــهَا، وْفِي مَـمُّو جَاشِي
رْسَمْتْــهَا بِفْـيَانَهْ.
2--
شْعَرْ سَايِبْ يْهَفْهف
ساكنهْ فيه ليالي شقايا
دهري نْعَدّيهْ فيه...
3--
ناعْمَة لمسِة يْدِيكْ
الرّضِيعْ عالفِطرَة يَعْبْدِكْ
لَوْ يِدّكْ جَاتْ عْلِيهْ
4--
صُوتْ مِن بْعِيدْ يْلاَغِي
مْلاَيِكةْ الجَنّة تْغَنّي
هذا آشْ ظَنّيتْ!
5--
دْخَلْتْها مِنْ عِينِيكْ
الجَنّةْ تْرِسْمتْ فِيهُم
وْلاَ شْفَعْ فيّا نْبي.
6- -
جَاوِي عَنْبِرْ مِسْكْ
بريحتك تْعَطّرِتْ الجَنّة.
إبْلِيسْ كبّرْ لِيكْ.
-7-
رِيتِكْ تتبخْتِرْ
حُورِ العين منّك غايرين
فِيكْ شَارْدِينْ بَاهْتِينْ...
~~~~~~~~~~~~~
ورْجعْتْ! رْجعْتْ لِجْحِيمْ
المِستنّيَة
دْمُوعِي خِيطينْ مِالْعِينينْ
مْزَارِبْ لْيالي السّود سَايْلَة
حَفْرو مْسَارِبْ عَالخدّينْ
وْسَافرو مْعَ شَهْقة الحَرقة
عليك.
كْفَرْتْ باللّي باعُوكْ في سُوقْ
السّبَايَا
وْبِاللّي حَرّفْ وأفْتَى في دِينْ
سْمَايَا
الكِبْدَة مِشْوِيَة مِكْويّة
القَلْب مَحْرُوقْ من وَحْشُو
ليك
الرّوحْ ذَوْبِتْها نِيرَانْ غْيَابِكْ
الحَامْيَة
وأنا بِلْهِيبْ مْحَبّتِكْ تْلَحّفْت
ليلْ مع نْهارْ نِتْقَلّى نِسْتَنىّ
في خْبَيّرْ...
وبْقِيتْ نِتْمَنّى وْفي نَارْ
جْهنّم نِتْشَهّى
فيها نَرْضى
نْكَمّلْ بقيّة حْياتي
أرْحِمْ
منْ ليلَة وَحْدَهْ نِتْواحْشِكْ فيها.
*سيرين
بن حميدة*
قُرِأ
هذا النّص للمرّة الأولى يوم 21 جانفي 2017 في الدّورة 13 لسيّدة الكلمات بفضاء
كارمن. وما سماواتي السّبع سوى الهيكات السّبع الحاضرات في هذا النّص واللاّتي كتبتهنّ لأوّل مرّة بالفصحى التّونسيّة.
تعليقات
إرسال تعليق